Milli Gimnastika Arenasında keçirilən Bakı "Böyük Dəbilqə" turnirinin 2-ci yarış günü Azərbaycan cüdoçuları üçün uğurla başa çatıb.

Prosport.Az xəbər verir ki, 2-ci yarış günündə cüdoçularımız 1 qızıl, 1 gümüş və 1 bürünc medal əldə edib.

73 kq çəki dərəcəsində Rəşid Məmmədəliyev finalda dünya 2-cisi Tatsuki İşihara ilə qarşılaşmalı idi. Lakin zədə səbəbindən tatamiyə çıxmadığı üçün yarışın gümüş medalçısı olub. Bu çəkidə Vüsal Qələndərzadə bürünc medal uğrunda gənclər arasında dünya çempionu Ryuqa Tanaka ilə qarşılaşıb və yuko xalı ilə qələbə qazanaraq karyerasında ilk dəfə "Böyük Dəbilqə" turnirində medal əldə edib.

81 kq çəki dərəcəsində Zelim Tçkayev qızıl medal uğrunda Kanadanın təmsilçisi Fransua Qotye-Drapo ilə tatamiyə çıxıb. Osetin cüdoçumuz yuko xalı ilə qalib gələrək "Böyük Dəbilqə"lərdə 4-cü, Bakıda isə 3-cü dəfə (2023, 2024, 2025) qızıl medal qazanıb. Bu çəkidə digər cüdoçumuz Ömər Rəcəbli isə yarışın 5-ci pilləsində qərarlaşıb.

2 günün nəticəsinə görə Azərbaycan cüdoçuları ümumilikdə 1 qızıl, 1 gümüş və 3 bürünc medal əldə edərək komanda hesabında 2-ci pilləyə yüksəlib. Cüdonun vətəni Yaponiya (6-4-1) aşkar fərqlə liderdir.

11:04

Bakıda keçirilən "Böyük Dəbilqə" turnirinin 2-ci günündə Azərbaycanın 11 cüdoçusu tatami üzərinə çıxacaq.

Prosport.Az xəbər verir ki, kişilər arasında Rəşid Məmmədəliyev, İbrahim Əliyev, Vüsal Qələndərzadə, Qadir Hüseynov (73 kq), Zelim Tçkayev, Ömər Rəcəbli, Məhərrəm İmamverdiyev və Süleyman Şükürov (81 kq) mübarizəyə qoşulacaq.

Qadınlardan isə Nərgiz Hacıyeva (63 kq), Südabə Ağayeva və Günel Həsənli (70 kq) qüvvəsini sınayacaq.

Qeyd edək ki, Milli Gimnastika Arenasında təşkil olunan turnir sabah başa çatacaq. Azərbaycan yarışda 32 idmançı ilə təmsil olunur. İlk gündə Əhməd Yusifov (60 kq) və Elşən Əsədov (66 kq) bürünc medal qazanıb.