Bu gün ölkəmizdə keçiriləcək cüdo üzrə "Böyük Dəbilqə" yarışında daha bir idmançımız mübarizə apara bilməyəcək.

Prosport.Az-ın xəbərinə görə, ölkəmiz yarışda 12 çəki dərəcəsində 33 idmançı (24 kişi, 9 qadın) ilə təmsil olunmalı idi.

Lakin püşkatma zamanı 60 kq çəki dərəcəsində hərbi xidmətdən yenicə qayıtmış Turan Bayramovun adına rast gəlinmədi. Azərbaycan Cüdo Federasiyasının icraçı vitse-prezidenti və baş katibi Rəşad Rəsullunun saytımıza verdiyi məlumata görə, o, zədələnib deyə adı son anda yarış siyahısından çıxarılıb. Beləliklə, Azərbaycan bu yarışda 32 idmançı (23 kişi, 9 qadın) idmançı ilə təmsil olunacaq.

Həmçinin, R.Rəsullunun sözlərinə görə, 60 kq çəki dərəcəsində U-23 Avropa və böyüklər arasında Azərbaycan çempionu Hüseyn Allahyarov, eləcə də Murad Fətiyev (90 kq), Açelya Toprak (57) zədələnib, Aydan Vəliyeva (52 kq) isə xəstələnib. Bu səbəbdən də qadınlarda 78 kq-da olduğu kimi, 52 kq çəki dərəcəsində də idmançımız olmayacaq.

100 kq çəki dərəcəsində olimpiya, dünya və Avropa mükafatçısı Elmar Qasımov isə təxminən 2 illik fasilədən sonra cüdoya qayıdıb Azərbaycan çempionu olsa da, onun da adı siyahıdan çıxarılıb. Rəşad Rəsullu buna belə aydınlıq gətirib: "Elmar yarış öncəsi lazımi formanı yığa bilmədi. Bu səbəbdən də məşqçilər onu yarışa buraxmadı".

Həmçinin, Hidayət Heydərov (73 kq), Elcan Hacıyev (90 kq) və Zelim Kotsoyevin (100 kq) bu yarışda iştirak etməyəcəyi daha öncədən məlum idi. Olimpiya və dünya çempionlarımıza istirahət verilibsə, Elcan isə keçirdiyi əməliyyatdan sonra bərpa prosesi keçir.

Qeyd edək ki, 14-16 fevralda Milli Gimnastika Arenasında keçiriləcək "Böyük Dəbilqə" yarışında 36 ölkədən 258 idmançı (166 kişi, 92 qadın) mübarizə aparacaq.

Səbuhi Musa