"O gün qalib olmasaydım, özümü heç vaxt bağışlamazdım".
Prosport.Az xəbər verir ki, bu sözləri Elnur Məmmədli Pekin-2008 Olimpiadasındakı qələbəsini xatırlayarkən deyib.
Azərbaycan Cüdo Federasiyasının vitse-prezidenti olimpiya medalının onu dəyişdiyini bildirib: "Yaxşılığa doğru dəyişdim. Küçədə, hər yerdə hamı məni tanıyır, yanlarından keçəndə baş barmaqlarını yuxarı qaldırırdılar. Həmin uğurdan sonra daha çox uşaq cüdo ilə məşğul olmağa başladı və bu idman növü daha da populyarlaşdı. Bu medal sayəsində həyatımı təmin edə bilmişəm. Həyat daha hamar və daha rahat olub, amma bunun üçün çox çalışmışam. Olimpiya Oyunlarından sonra ölkə prezidentinin təşkil etdiyi şəxsi təyyarə ilə Bakıya qayıtmışdım. Bunlar inanılmaz xatirələrdir”.
O, qızıl medal qazanacağını yuxusunda gördüyünü deyir: “7 yaşımda məşqlərə başlayanda bəzi insanlar böyük uğur qazanacağıma bəlkə də şübhə edirdi. Amma özümün heç vaxt şübhəm olmayıb. Unudulmaz gün – 2008-ci il avqustun 11-i ərəfəsində qələbə qazanacağımı yuxumda görmüşdüm. Prezidentin mənə medal təqdim etdiyini və təbrik etdiyini görmüşdüm. Səhər oyananda təbaşir götürüb otağımdakı yazı lövhəsinə olimpiya çempionu olacağımı yazdım. Digər idmançılarla, müxtəlif idman növlərindən olan dostlarımla danışdım və onlara çempion olacağımı dedim. Hamı bu sözləri eşidəndə şoka düşdü. Dedim və etdim”.
Məmmədli anasının sayəsində çempion olduğunu etiraf edir: “Anamın sayəsində olimpiya qızılını qazandım. O həmişə məni ruhlandırırdı. 1992-ci ildə Nazim Hüseynov Azərbaycandan ilk olimpiya çempionu oldu, amma onda o, MDB-ni təmsil edirdi. Anam dedi ki, müstəqil Azərbaycandan ilk çempion mən olacağam. Azərbaycan müstəqil ölkə kimi çıxış edəndən 2004-cü ilə kimi cüdoda olimpiya medalı yox idi. Ona görə də 2008-ci il avqustun 11-də qalib gələndə müstəqil ölkəmiz üçün 1-ci çempion mən olmuşam. Bu, xüsusi bir hadisə idi".
Olimpiya çempionu uduzmağı ağlından belə keçirmədiyini bildirir: "Anam əsas amil idi, amma mən də uşaqlıqdan həmişə çempion olmaq istəmişəm. Cüdo getdikcə populyarlaşırdı. Bu idman növündən xoşum gəlirdi. Təkcə Olimpiya Oyunlarında deyil, kiçik və ya böyük olsun, istənilən yarışda həmişə 1-ci olmaq istəyirdim.
Bacarığıma tam inanırdım. Olimpiadada iştirak həyatımda böyük şans idi və onu əldən qaçırmayacağımı dəqiq bilirdim. Dünyada 1 nömrə idim və 1 il əvvəl Rioda dünya çempionatında gümüş medal qazanmışdım. O vaxt Dünya Kuboku adlanan yarışlarda qalib olmuşdum. Qəti heç bir şübhəm yox idi: konsentrasiyam mükəmməl idi".
Elnur Məmmədli cüdo ailəsinin bir parçası olmaqdan qürur duyduğunu dilə gətirib: "Həmin gün qalib olmasaydım, özümü heç vaxt bağışlamazdım. Hər bir əsgər general olmaq arzusundadır. Hər bir cüdoçu olimpiya çempionu olmaq istəyir. Hansı il qalib olmağın heç bir əhəmiyyəti yoxdur. Olimpiya çempionu oldunsa, ömürlük çempion olaraq qalırsan. Cüdo bu gün ən populyar idman növlərindən biridir. Dünyanın 200-dən çox ölkəsində bu idman növü ilə məşğul olurlar. Bu da cüdonu populyarlaşdıran və onu bütün dünyada belə peşəkar zirvələrə çatdıran IJF prezidenti Marius Vizer və onun komandası sayəsindədir. Bunun bir parçası olmaqdan qürur duyuram”.