Azərbaycanın yeniyetmələrdən ibarət cüdo üzrə milli komandası 22-24 iyun tarixində Portuqaliyanın Odivelaş şəhərində keçirilən Avropa çempionatında tarixi nəticə əldə edərək 6 qızıl və 3 bürünc medal olmaqla 9 medal qazanıb.

Prosport.Az xəbər verir ki, fərdi yarışlarda Azərbaycan medal əyarına görə ümumi hesabda və oğlanlar arasında 1-ci yeri, qızlar arasında isə 4-cü yeri tutub. 

Bu, Azərbaycan milli yığmasının indiyə qədər iştirak etdiyi bütün Avropa çempionatlarında həm medalların sayına, həm də əyarına görə əldə etdiyi ən yaxşı nəticədir. Belə ki, medal sayına görə bu ilə qədər ən yaxşı nəticə ötən il keçirilmiş yarışda əldə edilmişdi (8 medal). Medalların əyarına görə ən yaxşı nəticələr isə 2000 və 2004-cü ildə olmuşdu (hər 2 ildə 4 qızıl medal qazanılmışdı). 

Qeyd edək ki, Məhəmməd Məmişov (50 kq), Mirxalıq İskəndərov (55 kq), Məhəmməd Musayev (60 kq) Əbil Yusubov (66 kq), Ramazan Əhmədov (+90 kq) və Vüsalə Hacıyeva (48 kq) bütün rəqiblərini məğlub edərək qızıl medal əldə edib. Əhməd Rüstəmov (50 kq), Mehdi Cəfərov (66 kq) və Xədicə Qədəşova (52 kq) isə Avropa 3-cüsü olublar.