Azərbaycan badminton millisi Bakıda ilk dəfə təşkil olunan qarışıq komandaların Avropa çempionatında ilk oyununu keçirib.

Prosport.Az xəbər verir ki, 1-ci qrupda yer alan yığma Bakı İdman Sarayında İngiltərə seçməsi ilə qarşılaşıb. Milli komanda gərgin və maraqlı mübarizə şəraitində keçən matçda rəqibinə 2:3 hesabı ilə uduzub.

Qarışıq qoşa kateqoriyasında Diki Panqestu – Keişa Fatimə Zəhra tandemi Roy İston – Lizi Tolman cütünə 0:2 (12-21,9-21) hesabı ilə məğlub olub. Kişi badmintonçuların şəxsi yarışında Eydi Reski Dvikahyo hər iki setdə Hari Huanqdan üstün olub – 2:0 (27-25, 21-13)

Ardınca qadınların şəxsi mübarizəsində Keişa Fatimə Zəhra Freya Redferni 2:0 (21-11,21-7) hesabı ilə məğlub edib.

Ümumi hesabda 2:1 hesabı ilə önə keçən Azərbaycan yığması kişilərin və qadınların qoşa yarışında rəqiblərinə yenilib. Aqil Qəbilov – Diki Panqestu qoşası Kolum Heminq – İtan Van Löyvenə 0:2 (12-21, 7-21) hesabı ilə uduzub.

Leyla Camalzadə – Həcər Nuriyeva cütü isə qadınların qoşa yarışında Ebiqeyl Haris – Estele Van Löyven qoşasına 0:2 (6-21, 9-21) hesabı ilə məğlub olub.

Azərbaycan millisi qrupda növbəti oyununu sabah İspaniya yığmasına qarşı keçirəcək. Görüş saat 10:00-da başlayacaq.