Milli Olimpiya Komitəsinin (MOK) İdman şöbəsinin müdiri Həsənağa Rzayev Azərbaycan Deflimpiya Komitəsində eyni vəzifəyə təyin olunub.

Prosport.Az-ın xəbərinə görə, sabiq güləşçi və Basketbol Federasiyasının keçmiş vitse-prezidenti Deflimpiya Komitəsinin İdman şöbəsinin müdiri təyin olunsa da, MOK-dakı vəzifəsini davam etdirəcək.

Yeri gəlmişkən, ötən ayın ilk günlərində MOK-da gözlənilən seçkilərin nəticəsinə uyğun olaraq, onun işdən ayrıla biləcəyini məhz saytımız yazmışdı. Lakin bu, baş verməyə də bilər. Çünki Gənclər və İdman Nazirliyində məlum dəyişikliklər MOK-dakı seçkiyə də təsirsiz ötüşməyib.

Hazırda MOK-un Baş Məclisinin bütün üzvlərinə seçkinin gündəliyi 2 həftə əvvəldən təqdim olunsa da, tədbir yubanır. MOK Nizamnaməsinin 6.6-cı maddəsinə əsasən, MOK-un İcraiyyə Komitəsi MOK-a üzvlüyə yeni namizədlərin siyahısını Baş Məclisə təqdim etməlidir. Ötən ilin dekabrında MOK-da prezident mandatının 8 illik müddəti də başa çatdığından, ölkə başçısının da iştirakı gözlənilir.

Qeyd edək ki, Deflimpiya Komitəsi eşitmə və danışma qüsurlu olan şəxslərin idmana inteqrasiyası yönündə 2023-cü ilin oktyabrın 13-də yaradılmış qurumdur. Bu qurumun rəhbəri Əmək və Əhalinin Sosial Müdafiəsi Nazirliyinin tabeliyində fəaliyyət göstərən Dövlət Tibbi-Sosial Ekspertiza və Reabilitasiya Agentliyinin İdarə Heyətinin sədri Anar Bayramovdur. Ötən il Gənclər və İdman Nazirliyinin Beynəlxalq Əlaqələr şöbəsinin müdiri Namiq Novruzov bu quruma baş katib təyin olunub.