Futzal üzrə Azərbaycan millisi Avropa çempionatının əsas mərhələsində Yunanıstanla bərabərə qalıb.

Prosport.Az xəbər verir ki, Bakı İdman Sarayında təşkil olunan matçda 2:2 hesablı heç-heçə qeydə alınıb.

Yığmamızın heyətində Oktay Rüstəmli fərqlənib. Qonaq komandada isə Leandros Tankas və Marios Ntatis adını tabloya yazdırıb. Yunanların heyətində Spridon Papakostas avtoqol müəllifi olub.

Oyundan sonra baş məşqçi Vitali Borisov bu sözləri deyib: "Meydançaya qələbə qazanmaq üçün çıxmışdıq. Oyuna da yaxşı start vermişdik. Matçın gedişində 100%-lik qol epizodunu boşa verdik. Daha sonra rəqib komanda üstünlüyü ələ aldı. Biz də hesabı öz xeyrimizə dəyişmək üçün qapıçını meydan oyunçusu ilə əvəzlədik. Təəssüf ki, öz səhvimizdən qol buraxdıq. Baxmayaraq ki, hesabı bərabərləşdirə bildik. Amma nəticəni çox pis hesab edirəm".

Qeyd edək ki, Azərbaycan millisi daha əvvəl Bakıda İsveçlə heç-heçə (3:3) edib, səfərdə Xorvatiyaya məğlub olub – 2:9.