Azərbaycan millisinin üzvü Hidayət Heydərov Beynəlxalq Cüdo Federasiyası (IJF) tərəfindən “İlin kişi cüdoçusu” adına layiq görülüb.

Prosport.Az xəbər verir ki, 73 kq çəki dərəcəsində ötən il həm Avropa, həm dünya, həm də olimpiya çempionu olan Hidayət Heydərov sevincini bu sözlərlə ifadə edib:

“Hər kəsi salamlayıram. Bu mükafata layiq görüldüyüm üçün çox xoşbəxtəm. Mükafat təkcə mənim deyil, bütün Azərbaycan xalqının mükafatıdır. Mənim arxamda böyük bir komanda durur. Azərbaycan Cüdo Federasiyasına, ailəmə, sevənlərimə təşəkkür edirəm”.

Azərbaycan millisinin almaniyalı baş məşqçisi Riçard Trautmann isə IJF tərəfindən "Ən yaxşı kişi komanda məşqçisi" adına layiq görülüb. O bununla bağlı hamıya təşəkkür edib:

“Möhtəşəm komandamıza dərin təşəkkürümü bildirirəm! Belə əzmkar atletlər, peşəkar məşqçilər və inanılmaz bir komanda ilə çalışmaq mənim üçün böyük şərəf idi. Mən tək yox, biz hamımız birlikdə tarix yazdıq. Hər birinizə minnətdaram”.

Qeyd edək ki, IJF ötən ildən müxtəlif nominasiyalar üzrə səsverməyə start vermişdi. Yanvarın 10-da səsverməyə yekun vurulmuşdu.