Son vaxtlar Azərbaycan qadın cüdosunda Gültac Məmmədəliyevanın çıxışı diqqət çəkir. O, qatıldığı son 3 turnirdən medalla qayıtmağı bacarıb. Lakin son yarışda aldığı zədə onu Monqolustanın paytaxtı Usanbaatarda keçirilmiş "Böyük Dəbilqə"dən kənarda qoydu.

Prosport.Az Gültac Məmmədəliyevadan aldığı müsahibəni təqdim edir.

– Zədəniz ciddidir?
– İspan idmançı Ariane Tore Solerlə görüşdə sağ qolum əzilib. 

– Avqustda "Masters" turnirində iştirakınız gözlənilir?
– Bəli, "Masters"də iştirak edəcəyəm.

– Avstriya Qran Prisində bürünc, Düşənbə Qran Prisində gümüş və Astanadakı "Böyük Dəbilqə"də bürünc medal qazandınız...
– Bunlardan əvvəl Tbilisidəki "Böyük Dəbilqə" yarışında bürünc medal əldə etmişdim. Bu il qatıldığım 5 yarışdan 4-də medal qazanmışam. Dünya çempionatında bir qədər bəxtim gətirmədi, sonradan bürünc medal alan fransalı Amandin Buşara uduzub mükafatsız qaldım.

– Sonuncu yarışda belə bir məqam nəzərə çarpdı. Daha çox şido ballarınız var. Hətta yarımfinalda italiyalı Odette Cuffridaya 3 şido balı ilə uduzdunuz. Digər 3 görüşünün hər birində də 2 şido balı almısınız...
– İtaliyalı rəqibim ikiqat Olimpiya mükafatçısı və Avropa çempionudur. Əvvəl tam inanmırdıq ki, belə çətin rəqibləri məğlub edə bilərik. Ona görə də inamsızlıq oldu.

– İspan idmançını, deyəsən, Avstriyada məğlub etmişdiniz...
– İspan rəqibimi Avstriyada bürünc medal uğrunda məğlub etmişdim. Amma bu dəfə ehtiyatlanırdım ki, bəlkə revanş almaq istəyəcək.

– Bizdə Azərbaycan qadın cüdosunda son illər belə uğurlu seriya yaxalayan olmayıb. Uğurlarınızın səbəbi nədir?
– Bir az inamsızlığım yaranmışdı. Sonradan inamım, özgüvənim geri qayıtdı və bunun sayəsində uğurlarımın ardı gəldi.