Azərbaycan Üzgüçülük Federasiyasının vitse-prezidentlərinin kimliyi məlum olub.
Məlum olduğu kimi, yanvarın 18-də Üzgüçülük Federasiyasının prezident seçkisində İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev 2012-ci ildən bu quruma rəhbərlik edən millət vəkili Xanlar Fətiyevi əvəzləyib.
Bəs federasiyanın seçilmiş yeni vitse-prezidentləri kimdir? Prosport.Az bunu araşdırıb.
Xaliq İldırımzadə – "Gənc Sahibkarlar Şəbəkəsi" İctimai Birliyinin sədridir. O, 2020-ci ildə bağlanmış "ƏmrahBank"da İdarə Heyətinin sədr müavini olub. Həmin bankın sahibi Yunis İldırımzadənin oğludur.
Dəyanət Sədullayev – 2023-cü ilin 15 iyunundan "Paşa Holdinq"in Aparat Rəhbəridir. "Azərelektroterm" ASC-nin baş mühasibliyindən bu vəzifəyədək yüksəlib.
Ümid Abuzərli – Yeni Azərbaycan Partiyası Gənclər Birliyinin Ofisinin Koordinatorudur. Əvvəl Diasporla İş üzrə Dövlət Komitəsinin Beynəlxalq Təşkilatlarla Əlaqələr şöbəsinin müdiri işləyib. Mətbuatda onun haqda gedən xəbərlərə inansaq, soyad fərqli olsa da (babasının adını soyad kimi götürüb – red.), onun Daşkəsən (2006-2011) və Salyanın (2011-2016) sabiq icra başçısı Tahir Kərimovun oğlu olduğu deyilir.
Həmçinin, İdarə Heyətindəki şəxslərin kimliyinə də nəzər salaq:
Şamil Əbdürrəhmanov – üzgüçülük üzrə millimizin baş məşqçisi Rəşad Əbdürrəhmanovun atasıdır. 2001-ci ildə Azərbaycan Respublikasında bədən tərbiyəsi və idmanın tədrisindəki xidmətlərinə görə "Əməkdar müəllim" fəxri adına layiq görülüb. O əvvəlki rəhbərliyin dövründə də İdarə Heyətində yer alıb.
Eldar Abbasov – sabiq rabitə naziri, hazırda Elm və Təhsil Nazirliyinin İdarəetmə Sistemləri İnstitutu baş direktoru olan akademik Əli Abbasovun oğludur. "Azərenerji" ASC-nin keçmiş prezidenti Etibar Pirverdiyevin kürəkənidir. Bir müddət əvvəl gömrük orqanlarından vəzifəsindən azad edilən E.Abbasov hazırda "Railways Communications & Technologies" (RCT) LLC (Dəmir Yolları, Rabitə və Texnologiyaları) şirkətinin Azərbaycandakı nümayəndəliyinin icraçı direktorudur.
Ruslan Ələkbərov – "Paşa Həyat" sığorta şirkətində Marketinq Departamentinin rəhbəridir. O həmçinin Azərbaycan Sahibkarlar Konfederasiyasında da işləyir. Əvvəllər "Bank Respublika"da da marketinq meneceri vəzifəsində çalışıb.
Azər Babayev – ötən ilin sentyabrınadək su polosu üzrə milli komandanın baş məşqçisi olub. O əvvəlki rəhbərliyin dövründə də İdarə Heyətində yer alıb.
Mark Koqanov – su polosu üzrə hakimlik edib. O, Xanlar Fətiyevin 2012-ci ildə ilk dəfə prezident seçilməsindən bu yana, həmişə vitse-prezident olub. Hazırda isə o, sadəcə İdarə Heyətinin üzvüdür.