Mövsümün ən həyəcanlı şəhər yarışlarından biri – "Formula 1" üzrə Azərbaycan Qran-prisi üçün bilet satışına başlanıb.

Prosport.Az xəbər verir ki, biletləri www.azerbaijangp.com rəsmi veb səhifəsindən əldə etmək olar. Həmçinin, “Baku City Circuit” mobil tətbiqi üzərindən 20% güzəştlə biletləri almaq mümkündür. Bu fürsət yalnız fevralın 5-dək davam edəcək.

Bakı Şəhər Halqası Əməliyyat Şirkəti azarkeşlərə 4 günlük biletlər təqdim edir. Hər il olduğu kimi, 3 günlük tribuna biletləri ilə yanaşı, bilet sahibləri Pit zolağı gəzintisi imkanı əldə edərək, sevimli F1 komandalarını, pilotları və onların qarajlarını yaxından izləmək təcrübəsi qazanırlar. Qeyd edək ki, ötən il Pit zolağı gəzintisində iştirakçı sayı rekord sayda olub. Yarış həftəsi ərzində keçiriləcək əyləncə proqramları ilə bağlı məlumatlar mütəmadi olaraq azarkeşlərə təqdim olunacaq.

Ötən ilki Bakı yarışı həftəsonunda azarkeşlərin sayı son 8 ildə ən yüksək səviyyəyə çataraq, 76 min nəfərə yüksəlib.

75 illik yubileyini  qeyd edən "Formula 1" üzrə dünya çempionatı bu il möhtəşəmliyi ilə xüsusilə yaddaşlarda qalacaq. Yüksək maraqla gözlənilən yarış bu il də dünya avtoidmanının diqqətini paytaxtımıza yönəldəcək.

Qeyd edək ki, "Formula 1" Azərbaycan Qran-prisi bu il sentyabrın 19-21-də keçiriləcək.