"30 iyun 2023-cü il tarixində Portuqaliyada IBSA-nın (Beynəlxalq Görmə Məhdudiyyətli İdmançılar Assosiasiyasının) növbədənkənar Baş Assambleyası keçiriləcək. Assambleyada yeni İdarə Heyəti seçiləcək. Mən IBSA-nın prezidentliyinə namizədliyimi irəli sürmüşəm və seçildiyim təqdirdə fəaliyyətimi bu dünya təşkilatında islahatlara və dəyişikliklərə həsr etmək istəyirəm. IBSA-da dəyişikliklər üçün platformamı həyata keçirə bilmək və maraqların toqquşması kimi mənfi nəticələrin qarşısını almaq üçün Azərbaycan Milli Paralimpiya Komitəsinin prezidenti vəzifəsindən istefa verirəm". 

Prosport.Az xəbər verir ki, bunu Milli Paralimpiya Komitəsinin prezidenti vəzifəsində çalışan İlqar Rəhimov bildirib. O, istefasını IBSA-ya prezident vəzifəsinə namizəd olması ilə əlaqələndirib. 1996-cı ildən Milli Paralimpiya Komitəsinə rəhbərlik edən 59 yaşlı İ.Rəhimov hamıya təşəkkür edib:

"İşimdə mənə kömək və dəstək olan hər kəsə təşəkkür edirəm. Bütün məşqçilərə və idmançılara fədakar əməklərinə görə təşəkkür edirəm. Daim göstərilən diqqət və qayğıya görə bütün dövlət qurumlarına təşəkkür edirəm. Ən əsası, bu illər ərzində mənə göstərilən etimada görə cənab Prezident İlham Əliyevə və Birinci vitse-prezident Mehriban xanım Əliyevaya təşəkkür edirəm. Söz verirəm ki, bu mötəbər dünya idman təşkilatının rəhbərliyində doğma Azərbaycanımı layiqincə təmsil edəcəyəm".

Qeyd edək ki, 7 iyulda Azərbaycan Milli Paralimpiya Komitəsinin növbədənkənar hesabat-seçki konfransı keçiriləcək və qurumun yeni rəhbərinin adı bilinəcək.