"Abşeron" basketbol komandasının hücumçusu Ceyln Şou klubun mətbuat xidmətinə müsahibə verib.

Prosport.Az həmin müsahibəni təqdim edir:

– Artıq bir neçə müddətdir ki, ölkəmizdəsiniz. Bakı haqqında təəssüratlarınızı bilmək maraqlıdır...
– Azərbaycandan həzz alıram. Bakıda bir neçə müxtəlif yerlərdə olmuşam və getdiyim hər yer həqiqətən də mükəmməl dizaynlı və gözəl olub.

– Ümumiyyətlə, Azərbaycandan təklif kimin vasitəsi ilə gəldi? Ölkəmiz haqqında öncədən məlumatınız var idi?
– Buradakı sabiq köməkçi məşqçi Daviti Çivçivadze mənə bura gəlməyi təklif etdi. O mənə burada nə etdiklərini, şəhərin gözəl və təhlükəsiz olduğunu dedi.

– Azərbaycandan təklif alanda kiminləsə məsləhətləşmisiniz?
– Səmimi desəm, Bakı haqqında heç bir məlumatım yox idi. Sənəd imzalayanadək heç nə eşitməmişdim.

– Bura necə uyğunlaşdınız?
– Mən adətən getdiyim hər yerə uyğunlaşa bilirəm. İnsanların dinini, inanclarını, qaydalarını olduğu kimi qəbul edən insanam.

– Basketbola keçid edək. Ölkə çempionatını və “Abşeron”un geridə qalan turlardakı oyununu necə dəyərləndirirsiniz?
– Son zamanlar komandada bəzi dəyişiklər olub. Mən səbirsizliklə gözləyirəm ki, dəyişikliklərin çətinliyi ilə necə mübarizə aparacağıq. Məncə, hər şeyin ən yaxşısına layiq olduğumuzu sübut edə bilərik.

– Azərbaycan Basketbol Liqasında müsbət və mənfi məqamlar haqqında fikirinizi bilmək istərdim...
– Mənim liqa ilə bağlı pozitiv və ya neqativ deyə biləcəyim bir şey yoxdur. Mən olduğum vəziyyətləri tənqid edəcək tip insan deyiləm.

– Kollektivlə və baş məşqçi ilə münasibətləriniz necədir?
– Mən baş məşqçi və komanda yoldaşlarım ilə çox yaxınam. Biz bir-birimizi təkmilləşdirmək istiqamətində daha da çox çalışırıq.

– Siz komandanın əsas oyunçularından hesab olunursunuz. Bir neçə matçda mən sizə xüsusi fikir vermişəm. Ünsiyyətcil olmağınızla yanaşı, həm də bir qədər tez həvəsdən düşən və ya tez inciyə bilən biri kimi təəssürat yaratmısınız. Elədir?
– Mən elə tez həvəsdən düşən və ya inciyən biri deyiləm. Mən məğlub olmaqdan nifrət edirəm. Lakin bir halda qəbul edərəm ki, biz hər şeyimizi ortaya qoyub, mübarizə aparıb uduzaq. Bax hə, o halda uduzanda çox əsəb keçirmirəm. Mən özümü və komandamı ən yaxşı standartlarda görmək istəyirəm. Özümə hər zaman tənqidi yanaşan olmuşam. Oyunda olarkən komanda yoldaşlarıma deyirəm ki, əgər biz oyun ərzində standart performans sərgiləyiriksə, bu, yaxşı hal deyil. Biz çalışmalıyıq ki, fərqli oyun nümayiş etdirək və inkişaf edək.

– Ümumiyyətlə ABŞ və Azərbaycanda idmana yanaşmada və mentalitetdə fərqlər ola bilər. Bu sizə çox problem yaratmayıb?
– Mən ABŞ və Azərbaycan haqqında hər hansısa bir fərqləndirmə etmək istəmirəm. Amma onu deyə bilərəm ki, biz amerikalılar istənilən komandaya qatdığımız güclə bərabər, həm də bu işə ümumilikdə yaxşı sərmayə edirik. Ona görə də biz amerikalılar bu idman növündə səylə çalışır və inkişaf edirik.

– Buradan sonrakı karyeranızı harada davam etdirmək istəyərdiniz?
– Ümumiyyətlə mən hər gün yeni nə isə öyrənmək həvəsində olan birisiyəm. Bilirəm ki, oynadığım hər bir komandada başqalarından yeni biliklər öyrənirəm və mənim oyun stilimdə daha da yüksək səviyyədə inkişafıma təkan verir. İstəyərdim ki, oynadığım hər komanda yüksək məvacib verə bilən, təhlükəsiz və rahat olsun.

– Ümumi olaraq basketbolda kumir olaraq kimi seçmisiniz?
– Mənim kumirim Kevin Dürantdır. Amma buna baxmayaraq, Nikola Yokiçi çox sevirəm. O, eqoist deyil və o, İQ-sü ilə komandaya böyük təsir göstərib. Assistlər, xal qazanması və s. göstəricilərdə mükəmməldir.

– NBA klublarından kimə azarkeşlik edirsiniz?
– Elə “Denver Naqets” deyərdim.

– Qayıdaq yenidən Bakı və sizə. Burada ən çox hansı yeməyi sevirsiniz?
– Mənim Bakıda sevimli yeməyim quzu ətidir. Mən onu çox sevirəm.

– Boş zamanını burada necə dəyərləndirirsiniz?
– Mən burada boş vaxtlarımı bərpa prossesinə həsr edirəm. Bununla yanaşı, həm şəxsi keyfiyyətlərimin, həm də həyat standartlarının daha da yüksəldilməsi istiqamətində müxtəlif şeylər öyrənirəm.