"Abşeron" klubunun baş məşqçisi Erhan Toker Azərbaycan Basketbol Liqasının son turunda "Neftçi"yə 76:84 hesablı məğlubiyyəti şərh edib.

Prosport.Az xəbər verir ki, türkiyəli mütəxəssis oyunla bağlı fikirlərini bölüşüb:

"Çox pis oynadıq.  Bır sıra səbəblər saymaq olar. 15 gündür oyun oynamırıq, bir oyunumuz təxirə salındı, proqramımız pozuldu. Amma bunlar hamısı boş bəhanələr olacaq. Reallıq  isə budur. Biz pis oynadıq və pis müdafiə olunduq. Hücumda da yaxşı deyildik. 3-cü period başlayarkən bizim ən məhsuldar oyunçularımızdan ikisinin cəmi 6 xalı var idi. Belə oyunda sona qədər fərq yaranmadan tab gətirmək belə, çətin idi. Matçı qazana biləcək nöqtəyə də gətirib çıxardıq, amma alınmadı. Səhvlərimiz buna imkan vermədi. Son dəqiqədə kritik vəziyyətdə Ceylon Şou Məhəmməd Hüseynliyə deyil, ötürməni Lari istiqamətində versəydi indi tamam fərqli nəticə ola bilərdi. Bir sözlə rəqibi təbrik edirəm".

- Rəqibin məşqçinin "Abşeron"da sizin keçmiş köməkçiniz Daviti Çivçizadze olması oyuna təsir etdi?

- Çox qısa müddətdir ki, o "Neftçi"dədir. Bizim oyunçularımızın özəlliklərini bilir və bu təbii ki, "Neftçi" adına çox faydalı oldu.

- Yeni oyunçu Məhəmməd Hüseynli bir ciddi səhv istisna olmaqla inamlı təsir bağışladı. Onun oyununu necə dəyərləndirirsiniz?

- Həm İsmayıl, həm Məhəmməd hərəsi oyunun bir bölümündə yaxşı təsir bağışladı. Hər ikisindən qarşıdakı oyunlarda da istifadə edəcəyik. Bəzən onların sayəsində qazanıb, bəzən uduzacağıq. Məhəmmədin bu gün sonda etdiyi səhvlə Makalpayn, İsmayıl Abdullayev və ya Sedrik Consonun etdiyi səhvlərin bizim üçün fərqi yoxdur. İdmandır, heç kim səhvlərdən sığortalanmayıb. Adları çəkilən hər iki yerli oyunçudan məmnunam.