“Quba”nın ABŞ-dən olan oyunçusu Simeon Körklənd klubun mətbuat xidmətinə müsahibə verib.
Prosport.Az həmin müsahibəni təqdim edir:
– Son 2 görüşdə “Şəki” və “Gəncə” klublarına məğlub olduq. Komandanın həmin matçlardakı çıxışını necə qiymətləndirirsiniz?
– Mövsüm ərzində hər komandada eniş və yoxuş olur. Hazırda bizim az oyunçumuz var. Bəziləri isə zədəlidir. Bütün bunlara baxmayaraq, biz sona qədər mübarizə aparırıq. Amma tezliklə döyüşüb yenidən daha yaxşı oynayacağıq.
– Rotasiya imkanlarının çox olmaması “Quba”nın məğlubiyyətlərinə birbaşa səbəbdir?
– Təbii ki, təsiri var. Amma oyun ərzində əlimizdə olan uşaqlarla və imkanlarımızla sona qədər oynayırıq. Mübarizəni dayandırmırıq. Sadəcə, oyunlarda da istədiklərimizin həyata keçmədiyi anlar olur. Fikrimcə, istənilən halda biz uduzduğumuz bəzi görüşləri qalib başa vura bilərdik. Mübarizə davam edir. Çalışacağıq ki, növbəti görüşlərdə qalib gələk.
– “Quba" B qrupunda 4-cü yerdədir. Sizcə, komandanın pley-off mərhələsinə yüksəlmək şansı var? Bunu reallaşdıra biləcəksiniz?
– Bəli. Buna çox inanıram. Düşünürəm ki, pley-offa yüksələ bilərik. Bunu etmək və pley-offda qalib gəlmək üçün komandamız və oyunçularımız var. Biz sona qədər mübarizə aparacağıq.
– Qarşıdakı turda komanda “Lənkəran”la qarşılaşacaq. Bu oyun haqda fikriniz necədir?
– Liqada komandaların hamısı yaxşı səviyyədədir. Biz də hazırlığımızı davam etdirmişik. Təbii ki, bu görüşdə də qələbə üçün oynayacağıq. Ümidvaram ki, uğurlu nəticə qazanarıq.
– Azərbaycan Basketbol Liqasına (ABL) uyğunlaşmısınız? Hansı komandaya qarşı oynamaq sizin üçün çətindir? Performansınızı tam göstərə bilmisiniz?
– Məncə, ABL əla liqadır. Mən də bacarıqlarımı göstərə bilirəm. Fikrimcə, liqada oyunum da yaxşı alınır. Mövsüm keçdikcə daha da yaxşılaşmağa davam edəcəyəm.
– Qubada oynamaq sizə hansı hissləri verir? Ev oyunlarında böyük azarkeş kütləsi olur...
– Mən azarkeşlərimizi çox sevirəm. Bizim ev oyunlarımızda olan izdiham heyrətamiz idi. Ümid edirəm ki, növbəti dəfə hər oyun üçün eyni izdiham və enerjimiz olacaq. Azarkeşlərimizə qələbə sevinci bəxş etmək üçün çalışırıq.