"Lənkəran"ın amerikalı basketbolçusu Andre Boll klubun mətbuat xidmətinə müsahibə verib.

Prosport.Az həmin müsahibəni təqdim edir:

– "Sumqayıt"a qarşı VII turun oyununda komandanın ən məhsuldar oyunçusu oldunuz. Buna baxmayaraq, yekunda 99:108 hesabl ilə məğlub oldunuz. Çıxışınız və öz oyununuz haqqında fikirləriniz necədir?
– "Sumqayıt"a qalib gəlməli idik. Çünki son zamanlar çətin dövr keçiririk. Buna görə hər oyunda hədəfimiz qələbədir. Fərdi çıxışımda güclü və zəif tərəflər var. Amma əsas odur ki, hər zaman qələbəyə kömək etmək üçün mübarizə aparıram və bunu bundan sonra da edəcəyəm.

– "Quba" ilə oyunda ilk ev qələbəmizi əldə edə biləcəyinizi düşünürsünüz?
– Bu matçda qələbə qazanacağımıza inanıram. Məşqlərdə doğru şeyləri müzakirə edirik. Sadəcə, bunu oyunda doğru icra etmək qalır.

– Hər oyunda "danklar"la diqqət çəkirsiniz. Xüsusi olaraq onların üzərində çalışırsınız? "Danklar"a olan sevginiz haradan gəlir?
– Xüsusi olaraq onlar üçün çalışmıram. Amma “danklar”ın oyuna gətirdiyi enerji və həyəcanı çox sevirəm.

– Azərbaycan Basketbol Liqasının hansı xüsusiyyətlərini bəyənirsiniz? Çempionatın səviyyəsi barədə nə deyə bilərsiniz?
– Azərbaycan Basketbol Liqasındakı rəqabəti bəyənirəm. Bu liqa mənə peşəkar karyeramda düzgün yol göstərir və basketbolçu olaraq irəliləməyimdə böyük rol oynayır.

– Lənkəran haqqında fikirləriniz necədir? Ən çox nəyi bəyənirsiniz? 
– Lənkəran gözəl yerdir, insanlar çox səmimi və mehribandır. Həmçinin, Azərbaycanda getdiyim bütün yerlər belədir.