23-25 iyunda Monqolustanın paytaxtı Ulan-Bator şəhərində keçiriləcək "Böyük Dəbilqə" turnirində iştirak edəcək cüdoçularımızın sayı azalıb.

Prosport.Az xəbər verir ki, buna səbəb zədəli Hidayət Heydərova (73 kq) daha 4 cüdoçumuzun qoşulmasıdır.

Bunlar Astana "Böyük Dəbilqə" turnirində millimizə yeganə medal qazandırmış Gültac Məmmədəliyeva (42 kq), Balabəy Ağayev və Turan Bayramov (hər ikisi 60 kq), və Səid Mollayidir (81 kq). Onlar zədəli olduqlarına görə milli yığmanın tibbi heyətinin qərarına əsasən heyətdən çıxarılıblar.

Onların zədələri uzun müddətli deyil, müalicələrinə dərhal başlanılıb. İdmançılarımız iyul ayının əvvəlindən etibarən məşqlərə geri dönəcəklər və 4-6 avqustda Macarıstanın paytaxtı Budapeşt şəhərində keçiriləcək Masters turnirində iştirak edəcəklər.

Bu isə o deməkdir ki, bu yarışda 60 kq çəki dərəcəsində çıxış edəcək kişi idmançımız olmayacaq. Yığmamız yarışda 8 çəki dərəsində 13 cüdoçu ilə təmsil olunacaq. Heyət aşağıdakı idmançılardan ibarət olacaq:

Qadınlar: Leyla Əliyeva, Könül Əliyeva (hər ikisi 48 kq), Aydan Vəliyeva (52 kq);

Kişilər: Kəramət Hüseynov, Yaşar Nəcəfov (hər ikisi 66 kq), İbrahim Əliyev, Nurlan Osmanov (hər ikisi 73 kq), Zelim Tçkayev (81 kq), Murad Fətiyev, Elcan Hacıyev (hər ikisi 90 kq), Zelim Kotsoyev (100 kq), Uşanqi Kokauri, Camal Həmzətxanov (hər ikisi +100 kq).

3 gün davam edəcək turnirdə dünyanın 45 ölkəsindən 349 idmançı iştirak edəcək. Cüdoçularımız mötəbər yarışda böyüklərdən ibarət yığmanın baş məşqçisi Riçard Trautman, böyüklərdən ibarət yığmanın böyük məşqçi Elçin İsmayılov, qadınlardan ibarət yığmanın baş məşqçisi Rəşad Məmmədov və böyük performans analitik Zaur Babayev rəhbərliyi altında çıxış edəcək. Yarışda “A” kateqoriyalı beynəlxalq dərəcəli hakim Nazim Umbayev ədalət təmsilçiləri arasında yer alacaq.

Qeyd edək ki, iİdmançılarımız yarışdan sonra – 26 iyun – 1 iyul tarixlərində Ulan-Batorda təşkil olunacaq təlim-məşq toplanışına qatılacaq.