Futbolun İnkişaf Fondunun (FİF) icraçı direktoru Tural Piriyevin Prosport.Az saytına müsahibəsi

– Dünən AFFA İcraiyyə Komitəsinin iclası keçirilib. Orada iş adamı olan Adnan Əhmədzadənin "Mingəçevir"ə sponsorluq etməsi məsələsi də müzakirə edilib. FİF-dən kimsə iştirak edib?
– Xeyr.

– Bizim sayt ilk dəfə 28 noyabrda Adnan Əhmədzadənin I Liqa klubu "Mingəçevir"ə sponsorluq etmək istədiyini yazmışdı. Bundan sonra həmin gün siz "növbəti gəlsin?" yazaraq feysbuk hesabınızda post paylaşmışdınız. Bəlkə bu barədə açıqlama verəsiniz...
– Ümumiyyətlə, hər hansısa sponsorluq barədə məlumatı ancaq imzalanma mərasimindən sonra verəcəyik. Danışıqların hansısa detallarını açıqlamaq, bu barədə məlumat vermək praktikada göstərib ki, bizə heç bir xeyir vermir. Ona görə indidən nəsə deməyin tərəfdarı deyiləm. "Mingəçevir"lə bağlı hər hansısa yenilik olacaqsa, klub tərəfindən rəsmi olaraq paylaşılacaq.

– Bəs "Mingəçevir"dən əlavə, başqa müsbətə doğru hansısa işartı var?
– Biz daim şirkətlərlə, iş adamları ilə danışıqlar aparırıq. Sponsor danışıqları fəaliyyətimizin bir hissəsidir. Bu barədə fəaliyyətimiz istər Mingəçevir, istər Gəncə, istərsə də digər şəhər və rayonlarımızla bağlı davam edir. Dediyim kimi, danışıqların detallarını açıqlayarkən, bunun hər hansısa müsbət tərəfi olmur. Hətta 2 dəfə təcrübədə bunun mənfi tərəfini görmüşük. Media nümayəndələrinə də məsləhət görərdim ki, imzalanma olmayanadək bu barədə məlumat dərc etməsinlər. Çünki bu bizim işimizə mane ola bilir.

– Bir də bu yaxınlarda sizin barənizdə məlumat yayılmışdı ki, yaxşı iş fəaliyyətinizə görə "Turan Tovuz"da sizə iş verilə bilər. Bu məsələyə münasibətiniz necədir?
– O sayt sağ olsun. Birinci məni "işdən çıxartdı", sonra "işə düzəltdi". "Turan Tovuz" klubunun rəhbəri Ehtiram Quliyevlə birgə həmin xəbəri oxuduq. Maraqlı xəbər idi.

– Oktyabrda sizin qurumun Himayəçilər Şurasından jurnalist Rüstəm Əfsərli "Neftçi"də işə başlaması ilə əlaqədar ayrıldı. Ora yeni üzv qəbul edilib? Və ya qəbul ediləcəksə, həmin şəxs də jurnalist olacaq?
– Hələ ki yeni üzv qəbul edilməyib. Növbəti iclasda bu barədə müzakirə olacaq. İlin sonuna iclasımız gözlənilir. Jurnalist məsələsinə gəlincə, üzvlərlə bağlı qərarı Himayəçilər Şurası verdiyi üçün bununla bağlı bir fikir bildirə bilməyəcəyəm.