Beynəlxalq Jüdo Federasiyasının (IJF) versiyasına görə Hidayət Heydərov (73 kq) və Zelim Kotsoyev (100 kq) ilin kişi cüdoçusu adı uğrunda mübarizə aparır.

Prosport.Az xəbər verir ki, bu ada 7 idmançı namizəddir və onların hər biri Olimpiya çempionudur.

Bundan başqa, millimizin almaniyalı baş məşqçisi Riçard Trautmann da ilin məşqçi nailiyyəti nominasiyasında seçilməyə 6 namizəd arasındadır. 2-ci dəfə fərqli çəkidə yeniyetmələr arasında dünya çempionu olmuş Nihad Məmişov ilin parlayan ulduzu seçilə bilər. Onun da bu siyahıda 5 rəqibi var.

İlin ipponu üzrə 20 namizəd var. Sevindirici haldır ki, ilin kişi cüdoçusu kimi, bu nominasiyaya da Azərbaycandan 2 cüdoçu namizəddir. Belə ki, Zelim Tçkayev (Əbu-Dabidəki "Böyük Dəbilqə"də rumıniyalı rəqibinə qarşı) və Turan Bayramovun (Tbilisidəki "Böyük Dəbilqə"də italiyalı rəqibinə qarşı) ipponla qələbələri bu nominasiyada qalib ola bilər.

Həmçinin, Azərbaycan Cüdo Federasiyasının daun sindromlu, autizmli və xüsusi qayğıya ehtiyacı olan uşaqların sosial inteqrasiyasını təşviq etmək və özünə inamını artırmaq məqsədi ilə bu ilin mayından start verdiyi adaptiv cüdo layihəsi uşaqlar üçün cüdo nominasiyasında namizəddir. Bundan başqa, daha 5 layihə də bu nominasiyaya iddialıdır.

Qeyd edək ki, səsvermə https://judotv.com/awards#vote-now saytı vasitəsilə aparılır. Səsvermə yanvarın 10-dək davam edəcək. Fevralın 2-də Fransanın paytaxtı Parisdə keçiriləcək "Böyük Dəbilqə" yarışında isə qaliblər IJF Cüdo Mükafatları Komitəsi tərəfindən açıqlanacaq.