"Abşeron" komandasının basketbolçusu Vilyam Cenkins klubun mətbuat xidmətinə müsahibə verib.
Prosport.Az həmin müsahibəni təqdim edir:
– Artıq bir neçə müddətdir ki, ölkəmizdəsiniz. Bakı haqqında təəssüratlarınızı bilmək maraqlıdır...
– Mən Bakıda vaxt keçirməkdən həzz alıram. Hər şey təsəvvür etdiyimdən də yaxşı oldu. Bakı çox sakit bir yerdir. İnsanlar da çox yaxşıdır.
– Bura necə uyğunlaşdınız?
– Bura çox tez adaptasiya oldum. Komandamıza qoşulan digər amerikalıların olması isə bu prossesi mənim üçün bir qədər də asanlaşdırdı.
– Azərbaycandan təklif alanda kiminləsə məsləhətləşmisiniz?
– Səmimi desəm, ötən mövsümdə birgə oynadığım komanda yoldaşlarımla bu barədə danışmamışam. Yalnız özüm bu barədə bir qədər araşdırmışdım.
– Oynadığınız klublara və ölkələrə baxanda Ermənistana rast gəldim (2020/21 mövsümündə "Kilikiya" komandasında oynayıb – red.). Orada oynayarkən Azərbaycan haqqında nə isə bilirdiniz? Biz onlarla 4 il öncə öz torpaqlarımızı geri qaytarmaq üçün müharibə edib, qələbə qazanmışıq. Maraqlıdır, sizə bu haqda məlumat verilmişdi?
– Mən Ermənistandan əvvəl Lüksemburq, İrlandiya və Avstraliyada da oynamışam. O zaman Azərbaycan haqqında məlumatlı deyildim. Daha sonra bura gəlməyə qərar verməmişdən öncə araşdırmışdım. 2 ölkə arasında olan konfliktdən və sizin qeyd etdiyiniz faktlardan da məlumatım oldu.
– Oradan sonra ölkəmizə gəlmisiniz. Sizin üçün Bakı oradan nə ilə fərqlənir?
– Düşünürəm ki, Bakı və Azərbaycan Ermənistan və onun paytaxtından daha gözəl yerdir.
– Basketbola keçid edək. Ölkə çempionatını və “Abşeron”un ilk dövrədəki çıxışını necə dəyərləndirirsiniz?
– Azərbaycan Basketbol Liqasını (ABL) bəyənirəm. ABL-in ilk dövrəsini qələbə ilə başa vurduq və güclülərin yer aldığı A qrupunu 4-cü yerdə tamamladıq. Özümüzü dəyərləndirməliyik və getdiyimiz yolu da təqdir edirəm.
– ABL-də müsbət və mənfi məqamlar haqqında fikirinizi bilmək istərdim...
– Müsbət məqamları daha çox qeyd edərdim. Oyunların konfliktsiz, normal mübarizə şəraitində keçməsini dəstəkləyirəm. Matçlardan həzz alıram. Mənfi nələrsə görməmişəm.
– Bundan sonra karyeranızı harada görürsünüz? Avropada hansı klubda oynamaq istəyərdiniz?
– Ümid edərəm ki, karyeram müsbət istiqamətdə inkişaf edəcək. Arzuladığım komandaya gəldikdə isə, bu, İtaliyanın "Olimpiya Milano"sudur.
– Ümumi olaraq basketbolda kumir olaraq kimi seçmisiniz?
– Ən sevdiyim basketbolçular Karmelo Entoni və Poul Corc olub.
– NBA klublarından kimə azarkeşlik edirsiniz?
– Melo karyerasını bitirdiyi üçün mən Poul Corc hardadırsa, ona azarkeşlik edirəm. Buna görə "Filadelfiya" azarkeşiyəm.
– Qayıdaq yenidən Bakı və sizə. Burada ən çox hansı yeməyi sevirsiniz?
– Mən dönəri çox sevirəm. Bakıda "101" adlı restoran var. Ora tez-tez gedirəm.
– Boş zamanını burada necə dəyərləndirirsiniz?
– Boş vaxtlarımda adətən "Yutub"da basketbolla bağlı podkastları izləyirəm, biznes və yatırımlarla bağlı araşdırmalar aparıram.
– Son olaraq hansı sualı eşitmək istəyərdiniz?
– Xeyr, hər hansı bir eşitmək istədiyim sual qalmadı. Müsahibə üçün təşəkkür edirəm. Sevə-sevə cavablandırdım.