"Lənkəran"ın türkiyəli bsketbolçusu Efe Baykal klubun mətbuat xidmətinə müsahibə verib.

Prosport.Az həmin müsahibəni təqdim edir:

– “Ordu”ya 55:92 hesabı ilə uduzduğunuz matçda digər görüşlərə nisbətən daha çox şans qazandınız və komandanın ən məhsuldarlarından oldunuz. Çıxışınızı necə dəyərləndirirsiniz?
– Son oyunlarda baş məşqçinin istəyi ilə daha çox parket üzərində oldum və bu imkandan yaxşı istifadə etdiyimi düşünürəm. Təbii ki, özümü inkişaf etdirməli tərəflərim var və hər gün bunların üzərində çalışıram. Məqsədim oyunumu artıraraq yoluma davam etməkdir.

– V turda rəqib “Şəki” olacaq. Bu oyundan gözləntiniz nədir?
– Tək düşüncəmiz qalib gəlməkdir. Çox yaxşı hazırlaşırıq. İtkilərimiz olsa da, rəqibi yaxşı analiz edib, onun üzərində hazırlaşmışıq. İnşallah, qalib gələcəyik.

– Azərbaycandan əvvəl Türkiyədə “Trabzonspor”, “Samsunspor” və “Əmlak Konut”un fotmasını geyinmisiniz. Liqalar arasında müqayisə aparsaq, sizcə, hansı oxşar və fərqli tərəflər var?
– Azərbaycan Basketbol Liqasının daha sürətlə inkişaf etdiyini düşünürəm. Çoxlu sayda legionerin liqada oynaması bunun isbatıdır.

– Komandaya ən son qatılanlardan oldunuz. Lənkərana adaptasiya olmaqda çətinliklər çəkdiniz?
– Bəli, komandaya son qatılanlardan biriyəm. Amma bu mənim üçün bir əngəl deyil. Burada çox yaxşı kollektiv var. Bir ailə kimiyik. Hər kəs bir-birinə kömək ediyi üçün heç bir çətinlik çəkmədim. Bunun üçün komanda yoldaşlarıma və məşqçilərimə minnətdaram.

– Azərbaycanda ən çox nələri sevirsiniz? Ölkələr arasında hansı bənzərlikləri bəyənirsiniz?
– Azərbaycanda ən sevdiyim xüsusiyyət insanların çox səmimi və hər zaman kömək etməyə hazır olmalarıdır. Bu mənada Türkiyə xalqı ilə çox bənzərlik var. 2 ölkənin yeməkləri də çox oxşardır. 

– Lənkəranı Türkiyənin hansı şəhərinə bənzədirsiniz?
– Lənkəran doğma şəhərim Malatyaya bənzəyir.