Azərbaycanın 8 atleti Polşada start götürən III Avropa Oyunlarında çıxış edib.

Prosport.Az xəbər verir ki, 3-ü Divizionda yer alan idmançılar ilk gündə millinin hesabına 70 xal qazandırıblar.

Ən yaxşı nəticəyə Anna Skidan imza atıb. O, çəkicatmada (71,69 m) 11 iştirakçı arasında birinci olub.

Aleksis Koppelyonun çıxışını da uğurlu saymaq olar. 38 yaşlı Kuba əsilli atlet üç təkanla tullanmada (15,91 m) 14 idmançı arsında ən yaxşı 2-ci göstərici ilə yadda qalıb.

Lamiyə Vəliyeva 400 m məsafəni 55,79 saniyəyə, Anna Yusupova isə 5000 m məsafəni 17:37.97 ilə qaçaraq, öz kateqoriyalarında finişə 5-ci sırada çatıblar.

Cavid Məmmədov 400 m məsafəni 49,58 saniyəyə, İlahə Quliyeva isə 100 metr məsafəni 12,39 saniyəyə qət ediblər. Hər iki idmançı 10-cu yerlə kifayətlənib.

Aleksey Əliəkbərov 100 m məsafəni 11,78 saniyəyə qaçmağı bacarıb. O, 14 iştirakçı arasında yalnız 2 rəqibini qabaqlayaraq, 12-ci olub.

Azərbaycan idmançılarından ən zəif nəticəni Elman Abışov göstərib. E.Abışov 800 m məsafəni 2:06,12 saniyəyə qət edib. O, 14 idmançının mübarizəsində sonuncu yeri tutub.

Qeyd edək ki, III Avropa Oyunları iyulun 2-dək davam edəcək.