Mingəçevirin "Kür" kişi həndbol komandası Avropa Kubokunun 1/16 finalında 1931-ci ildə yaradılmış İslandiyanın "Höykar" komandasına 25:30 və 27:38 hesabı ilə uduzdu. Bununla da Hafnarfyördur təmsilçisi 1/8 finala vəsiqə qazandı.
Prosport.Az "Höykar"ın 40 yaşlı baş məşqçisi Ausqeyr Örnd Hadqrimsondan müsahibə götürüb. Müsahibəyə keçməzdən öncə bildirim ki, Hadqrimson İslandiya millisində 2003-2018-ci illərdə 247 oyuna 414 qol vurub, 2004, 2008 və 2012-ci ildə keçirilmiş Olimpiadaların iştirakçısı olub, 2008-ci il Pekin Olimpiya Oyunlarının gümüş medalı və 2010-cu ildə Avstriyada keçirilmiş Avropa çempionatının bürünc mükafatına sahib çıxıb. O, 2012-2014-cü illərdə Fransanın məşhur PSJ klubunda çıxış edib.
– Mərhələ adlayan tərəf siz oldunuz. 1-ci oyunda cəmi 5 xal fərqlə qalib gəlmişdiniz. Cavab oyununda isə 11 xal fərq qeydə alındı. Bunun səbəbi nə idi?
– Qalib gəldiyimizə görə şadam. Düşünürəm ki, 2-ci oyunun 2-ci hissəsində yaxşı oynadıq. Müdafiədə yaxşı çıxış etdik, hücumları yaxşı həyata keçirdik. Taktiki cəhətdən yaxşı oynadıq və bunun nəticəsində belə fərqli hesabla qalib gəldik.
– "Kür" haqqında hansı sözləri deyə bilərsiniz?
– Yaxşı komandadır. Taktiki cəhətdən intizamlı oynadılar. Sadəcə, bizimlə matçda əks-hücumlar zamanı müdafiə olunmaq üçün sürətdə çatdırmadılar.
– Bilirik ki, Danimarka, İslandiya kimi ölkələrdə həndbol inkişaf edib. Nə etmək lazımdır ki, Azərbaycanda da həndbol bu səviyyəyə çatsın?
– Çox məşq keçməlidirlər. Komandada legioner oyunçular var. Bu, yaxşı haldır. Onlar yerli həndbolçuların inkişafında böyük rol oynamalıdır.
– Bildiyim qədəri ilə ilk dəfə Azərbaycandasınız. Hansı hisslərlə İslandiyaya qayıdırsınız?
– Hər şeyi bəyəndim. İnfrastruktur, qaldığımız hotel əla idi. Oyun zamanı da çox yaxşı atmosfer vardı. Biz İslandiyaya pozitiv xatirələrlə qayıdırıq.
– Əslində mən bu sualı verərkən, oyundankənar görüntülərlə bağlı hisslərinizi öyrənmək istəmişdim. Mingəçevir şəhərini və Kürqırağını gəzmək imkanınız oldu?
– Başa düşdüm. Təəssüf ki, şəhəri gəzmək üçün imkanımız olmadı. Çünki ancaq bu oyunlara köklənmişdik. Ancaq təşkilatçılarla danışarkən onlar şəhərinizin gözəl olduğunu bildirdi.
Səbuhi Musa
