Sabah start götürəcək cüdo üzrə Azərbaycan çempionatında məşhur idmançılarımızdan kimlərin iştirak edib-etməyəcəyi bəlli olub.

Bu barədə Prosport.Az-a Azərbaycan Cüdo Federasiyasının icraçı vitse-prezidenti və baş katibi Rəşad Rəsullu məlumat verib.

Onun sözlərinə görə, 5 cüdoçu bu turniri buraxacaq: "Olimpiya çempionlarımız – Zelim Kotsoyev və Hidayət Heydərov yarışda iştirak etməyəcək. Həmçinin, Elcan Hacıyev, Yaşar Nəcəfov və Gültac Məmmədəliyeva Azərbaycan çempionatını buraxacaq. Bu 3 idmançı zədəlidir, avqust ayında əməliyyat olunub. Paris Olimpiadasında yarışmış cüdoçularımızdan Balabəy Ağayev, Zelim Tçkayev, Uşanqi Kokauri və Leyla Əliyeva isə ölkə çempionu olmaq üçün güləşəcək".

Qeyd edək ki, cüdo üzrə Azərbaycan çempionatı 29 noyabr – 1 dekabr tarixlərində Bakı İdman Sarayında keçiriləcək. Bu gün saat 18:00-da püşkatma olacaq. Sabah saat 15:00-da isə yarışın açılış mərasimi baş tutacaq. Turnir 3 gün boyunca saat 09:00-da start götürəcək. 16:00-da isə final görüşləri keçiriləcək.