23-24 noyabrda Yunanistanın Saloniki şəhərində keçirilən yeniyetmələr arasında Avropa Kuboku turnirində Azərbaycan cüdoçuları 2 qızıl, 1 gümüş və 5 bürünc medal qazanaraq, medal əyarına görə ümumi hesabda 2-ci, oğlanlar arasında isə 1-ci yeri tutub.

Prosport.Az xəbər verir ki, 2 gün davam edən yarışda Azərbaycan oğlanlar arasında 8 çəki dərəsində 20 cüdoçu ilə təmsil olunub.

Cüdoçularımız turnirin ilk günündə 1 qızıl, 1 gümüş və 2 bürünc medal əldə edib. Oğlanlar arasında Zeyd Ələsgərov (-60 kq) qızıl, Fəxri Sahibzadə (-66 kq) gümüş, Anar Quliyev (-50 kq) və Rüstəm Qasımzadə (-55 kq) bürünc medal qazanıb.

2-ci yarış günü də Azərbaycanın 4 idmançısı medal qazanıb. Bu dəfə medal əyarı 1 qızıl və 3 bürünc medaldan ibarət olub. Sübhan Axundov (+90 kq) qızıl, Səid Şərifov (-73 kq), Amin Mehdiyev (-81 kq) və Tunar Fərzəliyev (+90 kq) bürünc medal qazanıb.

Beləliklə, Azərbaycan ümumilikdə 8 medal əldə edib. Yalnız oğlanlarda təmsil olunan millimiz 2 qızıl, 1 gümüş və 5 bürünc medalla ümumi hesabda Qazaxıstandan (2 qızıl, 3 gümüş, 3 bürünc medal) sonra 2-ci olub. Oğlanlarda isə komandamız ən yaxşı nəticəni göstərib.