"İlk rəqibim yerli idmançı Lorenso Şipp idi. Onunla ilk dəfə güləşirdim. Amerikalı idmançıya qalib gəldim. Sonra elə alındı ki, ardıcıl 3 rəqibim Fransa cüdoçusu (Filipp Juni, Mişel Dümortye, Alen Daye) oldu. İlk 2 fransalı cüdoçu ilə də ilk dəfə görüşürdüm. 2-ci fransalı ilə görüş bir az uzun çəkdi. Sonda onu əks fəndə salıb vaza-ari ilə qalib gəldim. Finalda qarşılaşdığım Alen Dayeni 6-7 il əvvəl məğlub etmişdim. Bu dəfə də ona qalib gələrək 12-ci dəfə dünya çempionu oldum".
Bunu Prosport.Az-a açıqlamasında ABŞ-nin Las-Veqas şəhərində 12-ci dəfə dünya çempionu olan veteran cüdoçu Fərhad Rəcəbli deyib.
65 yaşlı veteran bildirib ki, Las-Veqasla Bakı arasında saat fərqi çətinlik yaratsa da, məqsədinə çatıb: "Görüşlərimdə qələbələri fərqli kumi-katalarla əldə etdim. Çıxışımdan razıyam, pis alınmadı. Özünüz bilirsiniz ki, ABŞ-a gəlib-getmək çətin məsələdir. 12 saatlıq fərq var. Noyabrın 2-si ABŞ-yə çatmışdıq. 4-ü isə güləşməli idi idim. Çempionluqdan 1 gün əvvəl çarpayımda uzansam da, yuxum gəlmirdi. Çünki biz Bakı saatına öyrəşmişik. Fikirləşdim ki, sabah güləşə bilməyəcəyəm. Həmd olsun Allaha, buna baxmayaraq, yenə dünya çempionu oldum. Məqsədim bir idi: bayrağımızı qaldırıb, himnimizi səsləndirmək. Mən Azərbaycan bayrağını qaldırmaqdan ləzzət alıram...
Amerika qitəsində ilk dəfə 2005-ci ildə Kanadada dünya çempionu olmuşdum. 2016-cı ildə ABŞ-nin Mayami şəhərində qızıl medal qazanmışdım. 2018-ci ildə Meksikanın Kankun şəhərində də qalib olmuşdum. Bu qitədə 4-cü, ABŞ-də isə 2-ci dünya çempionluğumdur. Mən deyərdim ki, indi 8 il əvvəl Mayamidə keçirilmiş dünya çempionatından daha yaxşı hazırlaşmışdım.
42 yaşımdan veteranların yarışında iştirak edirəm. Bildiyiniz kimi, veteranların yarışında hər 5 yaşdan bir kateqoriyalar var. Mən M3-lə başlamışdım. Artıq 65 yaşım var və bu dünya çempionatında ilk dəfə M8 kateqoriyasında çıxış etdim".
10 dəfədən artıq dünya çempionları Beynəlxalq Cüdo Federasiyası tərəfindən xüsusi mükafatlandırılıb. 3 veteran arasında azərbaycanlımız F.Rəcəbli də var: "Ən çox dünya çempionu olan niderlandlı cüdoçudur (Hendrik Kope). O, 13 dəfə olub. Mən isə 12 dəfə dünya çempionu olmaqla 2-ciyəm. Bu səbəbdən də bizə yarışdan sonra xüsusi mükafat təqdim olundu".
O, qarşılaşdığı veteranların heç biri ilə əvvəl peşəkar cüdoda olarkən üz-üzə gəlməyib. Lakin Rəcəbli xatırlayır ki, bir dəfə 2002-ci ildə belə bir hadisə olub: "SSRİ yığmasında olarkən Məhəmməd Kukurxoyevlə (Qazaxıstan doğumlu, inquş əsilli idmançı cüdo üzrə Ukrayna çempionu olub, veteranlar arasında dördqat dünya və üçqat Avropa çempionudur – S.M.) bir otaqda qalırdım, dostluğumuz da vardı. Həmin vaxt fərqli çəki dərəcələrində çıxış edirdik deyə, güləşməmişdik. Ancaq elə oldu ki, veteranların yarışlarında onunla 2 dəfə rəqib oldum. 2002-ci ildə Şimali İrlandiyada keçirilən dünya çempionatının yarımfinalında mənə qalib gəldi. Növbəti il Yaponiyada keçirilən dünya çempionatında isə mən onu məğlub etdim".
F.Rəcəbli həmçinin, onu qeyd edib ki, yarışı 4 medalla (2 qızıl, 2 bürünc) başa vursalar da, 12 idmançımıza viza verilməməsi medalların kəmiyyətinə təsir edib: "67 ölkədən 1132 idmançının (bunların 10-u azərbaycanlı veteran olub – S.M.) iştirak etdiyi dünya çempionatına bəzi veteran cüdoçularımız viza problemi ucbatından qatıla bilmədi. Bizdən 12 nəfər ABŞ vizası ala bilmədi. Tək bizdə belə problem olmayıb. Məsələn, Qazaxıstandan 200-ə yaxın idmançı qeydiyyatdan keçmişdi. Ancaq vizaya görə yalnız 58 idmançı dünya çempionatına qatıla bilmişdi".
Sonda veteranlar üzrə komandamızın kapitanı da olan Fərhad Rəcəbli cüdo müəllimlərinə bəzi məsləhətlərini verib: "Seniorlar"da çıxış edərkən titulu olan idmançıların veteranların dünya çempionatında tanınmayan, idmanda nəticələri olmayan birilərinə məğlub olduğunu çox görmüşəm. Bəlkə də bu səbəbdən titullu bəzi idmançılar veteranların yarışına qatılıb tanınmamış rəqibinə uduzmaqdan çəkinir. Burada gənc vaxtında qazandığın titullar rol oynamır. Yaşından asılı olmayaraq, gündəlik peşəkar idmançı kimi məşqini keçən veteran cüdoçu burada qalib gələ bilər. Hətta gənclik illərində nəticəsi olmayan və ya cüdo ilə məşğul olmayan, sonradan maraq salıb bu idmana gəlmiş veteranın da qalib gəldiyini görmüşəm. Ona görə də hamı işinə peşəkar idmandakı kimi məsuliyyətlə yanaşsa, dünya çempionu ola bilər".
Səbuhi Musa
