Birləşmiş Ərəb Əmirliklərinin (BƏƏ) paytaxtı Əbu-Dabi şəhərində keçirilən "Böyük Dəbilqə" turnirində cüdoçularımız 1 qızıl, 1 gümüş və 2 bürünc medal qazanıb.

Prosport.Az xəbər verir ki, Azərbaycan yığması yarışda medal əyarına görə ümumi hesabda 4-cü, kişilər arasında 2-ci yeri tutub.

3 gün davam edən turnirdə yığma komandamız 8 çəki dərəsində 12 kişi və 2 qadın idmançı ilə təmsil olunub.

Kişilər arasında Zelim Tçkayev (-81 kq) bütün rəqiblərini məğlub edərək qızıl medalın sahibi olub. Uşanqi Kokauri (+100 kq) gümüş medal, Murad Fətiyev (-90 kq) bürünc medal qazanıb. Rəşid Məmmədəliyev (-73 kq) 5-ci, Rəşad Yelkiyev (-66 kq) və Ömər Rəcəbli (-81 kq) yarışı 7-ci sırada tamamlayıb.

Qadınlar arasında isə Acelya Toprak (-57 kq) bürünc medal qazanıb, Leyla Əliyeva (-48 kq) 7-ci yerdə qərarlaşıb. Yeri gəlmişkən, bu, kiprli Acelya Toprakın millimizə gəlişindən sonra qazandığı ilk medaldır.