İşğaldan azad olunmuş daha bir rayonumuzda idman yarışı keçiriləcək.

Prosport.Az-ın xəbərinə görə, beynəlxalq "Mingəçevir Reqatası-2024" yarışının ilkin mərhələsi məhz Füzulinin Aşağı Köndələnçay su anbarında keçiriləcək.

Həmin yarış ilk dəfə 16 oktyabrda sözügedən məkanda baş tutacaq. 17-18 oktyabrda isə reqata Mingəçevirdəki Kür təlim-məşq bazasında davam edəcək.

Qeyd edək ki, ümumi su tutumu 9,5 milyon kubmetr (faydalı həcmi 9 milyon kubmetr), hündürlüyü 25 metr olan Aşağı Köndələnçay su anbarı isə 1980-ci ildə istismara verilib. Füzuli rayonu işğaldan azad olunduqdan sonra burada daş örtüklü torpaq bəndin yuxarı byefində çökmüş daş örtüyü bərpa olunub, drenaj sistemi və nəzarət ölçü cihazları quraşdırılıb, qülləli suburaxıcının yükdaşıyan elementlərinin dəmir-beton konstruksiyaları, dib borusunun bütün mexaniki və qaldırıcı avadanlıqları, qurğunun estakadası metal və beton konstruksiyaları, eni 6 metr, uzunluğu 780 metr olan səthi sutullayıcının bütün beton konstruksiyaları, binanın mexaniki və hidromexaniki avadanlıqları yenidən qurulub, yarımstansiya və elektrik xətti bərpa olunub, Quruçay üzərində suqəbuledici qurğu tikilib. Quruçaydan gələn sular su anbarına yönəldilir.

Ölkə başçısı İlham Əliyev bu ilin mayın 10-da (Heydər Əliyevin ad günü) Köndələnçay su anbarları kompleksini işə salıb.