Gənc cüdoçulardan ibarət Azərbaycan millisinin Tacikistanın paytaxtı Düşənbədə keçiriləcək dünya çempionatı üçün heyəti açıqlanıb.

Prosport.Az xəbər verir ki, yığma yarışda 11 çəki dərəsində 9 oğlan və 4 qız idmançı ilə təmsil olunacaq.

Cüdoçular oktyabr 2-5-də çempionatın fərdi, oktyabrın 6-da isə komanda yarışlarında çıxış edəcəklər.

Qadınların mübarizəsində Könül Əliyeva (48 kiloqram), Xədicə Qədəşova, Aydan Vəliyeva (hər ikisi 52 kiloqram) və Fidan Əlizadə (57 kiloqram) bacarıqlarını göstərəcəklər.

Kişilərdə isə Nizami İmranov (60 kiloqram), İslam Rəhimov, Məhəmməd Musayev (hər ikisi 66 kiloqram), Vüsal Qələndərzadə (73 kiloqram), Süleyman Şükürov (81 kiloqram), Tuncay Şamil, Aslan Kotsoyev (hər ikisi 90 kiloqram), Əjdər Bağırov (100 kiloqram) və Kənan Nəsibov (+100 kiloqram) güclərini yoxlayacaqlar.

Pərvanə Abdullayeva (70 kiloqram), Nigar Süleymanova (+78 kiloqram) və Süleyman Əliyev (73 kiloqram) komanda yarışında mübarizəyə qoşulacaqlar.

Cüdoçulara böyüklərdən ibarət yığmanın baş məşqçisi Riçard Trautman, qadınlardan ibarət millinin baş məşqçisi Rəşad Məmmədov, məşqçi Elnur İsmayılov, gənclərdən ibarət yığmanın baş məşqçisi Elxan Məmmədov və məşqçi Elxan Rəcəbli rəhbərlik edəcək.

Qeyd edək ki, yarışda Azərbaycan Cüdo Federasiyasının “A” kateqoriyalı beynəlxalq dərəcəli hakimi Nazim Umbayev ədalət təmsilçiləri arasında yer alacaq.