"Formula 1" Katar Eyrveys Azərbaycan Qran-prisi rekordlarla yadda qalıb.
Prosport.Az xəbər verir ki, yarış növbəti rekorda imza atıb. 13-15 sentyabr tarixlərində baş tutmuş möhtəşəm idman yarışını tribunalardan və ayaqüstü izləyənlərin sayı son 8 ildə ən yüksək həddə çataraq 76 minə yüksəlib. Tribunalar hələ yarış başlamamış tam dolub. Bakı Şəhər Halqası Əməliyyat Şirkəti (BŞH) bu il daha 2 yeni tribuna quraşdırılmaqla ümumilikdə sayı 10-a çatdırıb.
Ötən illə müqayisədə izləyici yerlərinin sayında 35% artım olub. Maraqlı faktlardan biri Azərbaycanın yerli azarkeş sayına görə top 5 ölkə sırasında yer almasıdır. Artan marağı nəzərə alaraq, gələn il azarkeş yerinin artırılması nəzərdə tutulur.
Bu il könüllü və marşal müraciətləri də rekord həddə çatıb. Belə ki, yarışda iştirak etmək üçün 4 gün ərzində 16 mindən çox namizədin müraciəti qeydə alınıb. 2 minə yaxın könüllü seçim mərhələlərindən uğurla keçməklə iştirakını təsdiq edib. Yarış müddətində 1400-ə yaxın marşal cəlb olunub. Onlardan 100-dən çoxu əcnəbi olub.
Builki Bakı yarışını 300-ə yaxın media nümayəndəsi işıqlandırıb. Bunların 200-ə yaxını beynəlxalq jurnalistlər olub. Dünya media nəhəngləri "Sky Sports", "Motorsport", "Canal+", "Netflix", "The Sun" və digərləri bu sırada yer alaraq, 3 gün ərzində həyəcanlı Qran-prini bütün dünya ilə paylaşıb.
Yarış həftə sonu təkcə qəzalarla deyil, həm də əyləncə və konsert proqramı ilə dolu olub. Fan zonada bu il ilk dəfə "Formula 1"ə aid bütün aktivasiya quraşdırılıb. Məşhur əyləncə aktivasiya stendləri, tanınmış pilotlarla keçirilən avtoqraf sessiyaları, musiqi proqramları və rəqslər azarkeşlərə unudulmaz anlar bəxş edib.
Bundan başqa, "Crystal Hall"da keçirilən konsertlər – Vill Smit, DJ Blək Kofi və Cey Balvinin səhnə performansları – həftəni əsl əyləncə festivalına çevirib.
Yarışın özü isə tamaşaçıları hər an diqqətdə saxlayıb. Bakı treki yenə öz məşhur dar döngələri və sürətli düz yolları ilə pilotlara çətin anlar yaşadıb. Ard-arda qəzalar həyəcanı daha da artırıb. "Red Bull" pilotu gözlənilmədən divara çarpılıb, "Ferrari" komandasının maşını isə döngədə nəzarətdən çıxıb. Ən maraqlı məqam "McLaren"in gənc pilotu Oskar Piastrinin ustalıqla toqquşmalardan qaçaraq, 51 dövrəni lider olaraq tamamlaması olub. Bu çətin şəraitdə Piastrinin göstərdiyi performans uzun müddət yadda qalacaq. "Ferrari"dən Şarl Lekler və "Mersedes"dən isə Corc Rasel amansız rəqabət apararaq müvafiq olaraq 2-ci və 3-cü yerləri tutub.
Bu il Bakı Şəhər Halqası Əməliyyat Şirkəti sürücülərin rahatlığı üçün yarışla əlaqədar bağlanmış yolları sürətlə açıb. Nəqliyyat məhdudiyyətləri 8 ildə ilk dəfə olaraq 24 saat tamam olmadan aradan qaldırılıb.
