Kamandan oxatma üzrə qadın millimizin aparıcı üzvü Yaylagül Ramazanovanın Prosport.Az saytına müsahibəsi 

– Mayda Azərbaycan Kamandan Oxatma Federasiyasının rəhbərliyi dəyişdi. Ötən ayın sonlarında təşkil olunan Azərbaycan çempionatının keçirilməsində bu fərq nədə hiss olundu?
– Əslində əvvəllər də pis keçirilmirdi. Amma bu yarış daha möhtəşəm təşkil olunmuşdu. Əvvəllər tamaşaçılar yalnız idmançıların valideynləri olurdusa, indi tanımadığımız adamlar çempionata baxmağa maraq göstərmişdi. Biz özümüz də bu qədər adam gələcəyini gözləmirdik.

– Yığma komandanın baş məşqçisi Natiq Fazilov bildirdi ki, təşkilatçılıq Paris Olimpiadasını xatırlatdı...
– Bəli. Demək olar ki, ab-hava eyni idi.

– Sanki Azərbaycan çempionatında final sizin üçün bir qədər çətin alındı...
– Sadəcə, hava şəraiti küləkli olduğundan, istədiyimiz nəticəni göstərə bilmədik. Xallarımın sayını 28-30 gözləyirdim, ancaq 26-27 oldu. Bir dənə də 6 xallıq atışım oldu. Bu da küləkdən gələn durum idi. Oxun istiqamətini dəyişirdi. Ancaq Olimpiadadakı yarışın özgüvəni burda da vardı. Ona görə də çempion oldum...

– Bəs Parisdə belə külək yox idi?
– Orada hava stabil idi. Açıq havada keçirilirdi. Boşluq olsun deyə, tamaşaçıları yuxarıda əyləşdirmişdilər. Burada isə bir tərəf qapalı idi.

– Baş məşqçiniz bildirmişdi ki, ilin sonunadək elə bir yarış yoxdur. Növbəti il üçün hansı hədəflər olacaq?
– Avropa Oyunlarına lisenziya qazanmağa çalışacağam. Dünya çempionatı var. Ümumiyyətlə, yarışlar nə qədər çox olsa, bir o qədər yaxşıdır.

– Mükafatlandırma mərasimində sizə bir kiçik qız uşağı da yaxınlaşdı. O sizin övladınız idi?
– Xeyr. Qardaşım qızı idi (gülür).