Bakıda bu günlərdə "Formula 1" üzrə Azərbaycan Qran-prisi keçirilir. Yenə şəhərimiz bu mötəbər yarış münasibətilə xarici qonaqlarla doludur. Şəhərin mərkəzində hər addımbaşı xarici turistlərə rast gəlmək mümkündür.
Yarış ənənəvi olaraq "İdman" telekanalı vasitəsilə bizə göstərilir. Ancaq bu il yarışın işıqlandırılmasında axsaqlıqlar var. Dünyanın gözünün burda olduğu yarış Azərbaycanda müstəqil media tərəfindən işıqlandırılmır. Bunun səbəbi isə təşkilatçı Bakı Şəhər Halqasının rəhbərliyinin səriştəsiz işidir.
Belə ki, media işçilərinin çoxuna bu dəfə səbəbsiz şəkildə akkreditasiya verilməyib. Daha doğrusu, səbəb göstərilib. Ancaq kim ki akkreditasiya ala bilməməsinin səbəbini soruşubsa, onlara bu, izah olunub. Ancaq buna səbəb demək mümkünsə... Məsələn, elə ictimai-siyasi sayt var ki, ölkənin aparıcı qurumlarından biridir, kifayət qədər oxucu kütləsi var. Oranın baş redaktoruna IP giriş əsas gətirilib. Ancaq saytına özü və əməkdaşından başqa, kiminsə daxil olmadığı idman saytına akkreditasiya verilib. Həmin sayt ki, ötən ilədək qara siyahıda idi və ona akkreditasiya verilməkdən imtina edilmişdi.
Şəxsən bizim sayt ötənilki haqq-hesablara, "qara siyahı" məsələsinə görə akkreditasiya müraciəti etməmişdi. Görünən budur ki, müraciət etsəydik, biz də münasibətləri yumşaltmaq üçün akkreditasiya ala biləcəkdik. Zatən "Prosport" ildə bir dəfə "Formula 1" üçün, orada verilən banket qonaqlıqlar üçün idman jurnalisti olanların yeri deyil və əmin idik ki, bu dəfə "qırmızı işıq" "yaşıl"la əvəzlənəcəkdi. Ancaq insanda üz yaxşı şeydir. Əqidəsini itirməmək isə ondan da yaxşıdır. Biz hələ də ötən il səbəbsiz yerə bizə akkreditasiya verilməməsinə görə üzrxahlığı eşitməmişik.
Bəli, ötən il bizim üçün çətin dövr idi. Bir neçə federasiya bizə məlum səbəblərdən beynəlxalq yarışlarına akkreditasiya verməkdən imtina etmişdi. Ancaq hamısı qorxmadan bunun səbəbini bizə izah etmək cürətində bulunmuş, biz də bunu başa düşmüşdük. Yalnız Bakı Şəhər Halqası bu səbəbi qorxaqcasına bildirməkdən çəkinmişdi.
Gimnastika Federasiyasının, yoxsa Bakı Şəhər Halqasının mətbuat katibi olduğu bilinməyən Turab Teymurov yarış başlayan vaxt Parisdə olub. Ölkəmizdə mötəbər yarış gedir, Bakı Şəhər Halqasının mətbuat katibi Fransada idi. İndi qayıdıb-qayıtmayıb, mən bilmirəm, ancaq öz mediamıza qarşı qoyulan hörmət elə burdan başlayır.
Narazı həmkarlar bildirir ki, Bakı Şəhər Halqası daha əvvəlki tək mediaya qarşı isti münasibət göstərmir. Bəli, əvvəlki rəhbərliyin vaxtında da hər şey ideal deyildi. Ancaq yarışdan öncə səhər yeməyi bəhanəsi ilə media bir yerə yığılır və səmimi söhbət mühiti yaradılırdı. İndi isə bu məsələlər yığışdırılıb.
Ötən il söz vermişdik ki, bu qurumun rəhbəri Maqsud Fərzullayev haqqında da yazacağıq. Gün gəlib, yetişdi. Bu adam Bakıda çox gözəl "Crescent" layihəsi ilə tanınan Fazil Fərzullayevin oğludur. Unutmasın ki, bu yağlı yerə gəlməsi də özünün xüsusi istedadına görə yox, Fazil kişinin hörmətinə görədir.
Görün qurum rəhbəri və onun əməkdaşları necə səriştəsiz insanlardır ki, nazirliyin fotoqrafı, Milli Gimnastika Arenasında (əvvəllər bu arenanın direktoru olub – S.M.) şəxsən tanıdığı, duz-çörək kəsdiyi idman jurnalistinə akkreditasiya verilməyib. Hələ mən avtomobildən yazan jurnalistlərə akkreditasiya verilməməsini demirəm. Bəli, yaxalarını kənara çəkmək üçün bunu FIA (Beynəlxalq Avtomobil Federasiyası) ilə izah edəcəklər. Ancaq orada işləyən hər bir əməkdaş bilir ki, mövsüm öncəsi hər bir yarış üçün media akkreditasiya almaq üçün əsas şərtlər açıqlanır. Bunu ki, bizim Bakı Şəhər Halqası jurnalistlərə təfsilatı ilə izah edə bilərdi. Bax, bunun üçün media ilə görüşlər yalnız yarışa 10 gün qalmış təşkil olunmamalı idi. Hər ay bu yöndə sayt rəhbərlərinə izahlar verilməli, çatışmazlıqların aradan qaldırılmasına çalışılmalı idi.
Ancaq qurumun mətbuat katibi öz işini qoyub qeyri-rəsmi gimnastika tədbirlərində peyda olursa, Parisdə Olimpiada və ya Paralimpiya Oyunları üçün dincəlirsə, təbii ki, bunu təşkil etmək üçün adam da olmayacaq. İnanın, Bakı Şəhər Halqasının əməkdaşları da bu durumdan narazıdır. Çünki əməkdaşlar öz işlərini kənara qoyub başqa iş görməyə məcbur edilir. Qurumun mətbuat katibi buna nümunədir...
Səbuhi Musa