16-18 iyunda Qazaxıstanın paytaxtı Astanada keçiriləcək cüdo üzrə "Böyük Dəbilqə" turnirində iştirak edəcək cüdoçularımızın sayında dəyişik olunub.

Prosport.Az xəbər verir ki, ilkin siyahıda 16 cüdoçumuzun yarışacağı nəzərdə tutulsa da, say 17-yə qalxıb. Belə ki, 90 kq-da 2 cüdoçumuz mübarizə aparacaq. Perspektivli və istedadlı cüdoçu Elcan Hacıyev də bu siyahıya əlavə olunub.

Beləliklə, "Qazaxıstan Barışı" adlandırılan "Böyük Dəbilqə"də Azərbaycanı 13 kişi və 4 qadın idmançı təmsil edəcək. Nizam-intizamla bağlı millidən müvəqqəti kənarlaşdırılmış Kəramət Hüseynov da uzun müddətdən sonra yığmanın heyətində mübarizə aparacaq.

Beləliklə, Astanada kişilərdə Kənan İsmayılov, Nazir Talıbov (hər ikisi 60 kq), Kəramət Hüseynov, Kamran Süleymanov (hər ikisi 66 kq), Telman Vəliyev, Rəşid Məmmədəliyev (hər ikisi 73 kq), Məhərrəm İmamverdiyev, Zelim Tçkayev (hər ikisi 81 kq), Vüqar Talıbov, Elcan Hacıyev (hər ikisi 90 kq), Aslan Mirzəyev (100 kq), Uşanqi Kokauri, Camal Həmzətxanov (hər ikisi +100 kq), qadınlarda Leyla Əliyeva, Ramilə Əliyeva (hər ikisi 48 kq), Aydan Vəliyeva və Gültac Məmmədəliyeva (hər ikisi 52 kq) mübarizə aparacaq.

Qeyd edək ki, bu turnirində ümumilikdə 42 ölkədən 334 idmançının (190 kişi, 144 qadın) iştirakı gözlənilir.