"İnter"in sabiq futbolçusu İran vətəndaşına zor tətbiq etdiyi üçün həbs edildi - FOTO

Bakıda İran vətəndaşına qarşı quldurluq etməkdə təqsirləndirilən Abşeron rayon sakinləri Orxan Atayev, Miqdar Məmmədov və Məhərrəm Məhərrəmovun cinayət işi üzrə məhkəmə iclası keçirilib.

Prosport.Az xəbər verir ki, Bakı Ağır Cinayətlər Məhkəməsində hakim Novruz Kərimovun sədrliyi ilə keçirilən məhkəmə prosesində hökm oxunub.

Hakimlər kollegiyasının hökmünə əsasən Məhərrəmov və Atayevə 8 il cəza təyin edilib. Ev dustaqlığında olan Miqdar Məmmədov isə 4 il azadlıqdan məhrum edilib. O, məhkəmə zalında həbs edilib.

Qeyd edək ki, təqsirləndirilən şəxslərdən Miqdar Məmmədov futbolçudur. 17 yaşlılardan ibarət milli komandamızın da şərəfini qoruyub. Bakının “İnter” klubunun, indiki "Keşlə"nin üzvü olub.

Azərbaycan yığmasının üzvü həbs edildi

Hər 3 təqsirləndirilən şəxs kafedə oturub yeyib-içiblər. Daha sonra İran vətəndaşı Murtəza Azər və Bakı şəhər sakini Sədi Məmiyev gənclərdən onları daha yaxşı əylənə, yeyib-içə biləcəkləri bir məkana aparmalarını istəyiblər və bildiriblər ki, onların hesabını da ödəyəcəklər.

Bakıda məkanlardan birinə gələn şəxslər yeyib-içiblər. Hesabın 750 manat olması yeni tanışların xoşuna gəlməyib. İran vətəndaşı bu qədər hesabı ödəməkdən imtina edib və yalnız özünün və tanışının payına düşən pulu ödəyib.

Onlar kafedən birlikdə çıxıblar. Binəqədi rayonunun Fatmayi qəsəbəsinə çatanda onlar mübahisə ediblər. 3 gənc dost Murtəza Azərə və Sədi Məmiyevə zor tətbiq edərək 750 manat pullarını alıblar.

  • Saytın müəllif hüquqları qorunur. Məlumatdan istifadə etdikdə istinad mütləqdir.
    Məlumat internet səhifələrində istifadə edildikdə müvafiq keçidin qoyulması mütləqdir.